ခိုလှုံကိုးစားရာ
20.7.2022(Wednesday)
သုတ္တံကျမ်း ၃:၅” ထာဝရဘုရားကို စိတ်နှလုံးအကြွင်းမဲ့ကိုးစားလော့”
ကျွန်ုပ်တို့ မှီတင်းနေထိုင်သော ဤကမ္ဘာကြီးထဲတွင် နိုင်ငံတိုင်းသည် မိမိ၏နိုင်ငံသားများ အခက်အခဲကြုံတွေ့သည်အခါ အရေးပေါ်ဆက်သွယ်နိုင်ရန် မီးသတ် လူနာတင်ကား ကယ်ဆယ်ရေး စသောဌာနများအတွက် အရေးပေါ်ဖုန်းနံပါတ်များရှိသည်။ လူတို့သည် အားကိုးအားထားပြုကြပါသည်။ ထိုအတူပဲကျွန်ုပ်တို့၏ ဘဝအသက်တာထဲတွင် ကိုးစားခြင်းသည် အရေးကြီးပါသည်။ ယုံကြည်သူခရစ်ယာန်အသက်တာတွင် ထာဝရဘုရားကို စိတ်နှလုံးအကြွင်းမဲ့ ကိုးစားလော့ဟု သုတ္တံကျမ်းထဲမှ တိုက်တွန်းထားပါသည်။
ကမ္ဘာပေါ်တွင် အမေရိကန်နိုင်ငံသည် အစစအရာရာ လုံခြုံမှုအရှိဆုံးဟု ရပ်တည်ခဲ့ရာမှ ( ၂၀၀၁) ခုနှစ် စက်တင်ဘာလ ( ၁၁) ရက်နေ့တွင် နယူးယောက်မြို့ရှိ ဝေါလ်ထရိတ်စင်တာသည် နာရီပိုင်းအတွင်း ပျက်စီးပြိုကျခဲ့ရပါသည်။နည်းပညာ ဘယ်လောက်ပင်တိုးတတ်စေကာမူ ရန်သူကိုအနိုင်မတိုက်နိုင်ပါ။ လူကိုကိုးစားခြင်းထက် ဘုရားသခင်ကို ကိုးစားခြင်းက သာ၍ကောင်းသည်ဟု သမ္မာကျမ်းစာက ဖော်ပြထားပါသည်။စာရေးသူ၏ ဘဝအသက်တာထဲတွင်လည်း ငွေကြေးအခက်ခဲတစ်ခါကြုံဖူးပါသည်။ ကြံရာမရအဆုံး နီးစပ်ရာ ကူညီနိုင်မည့်သူများကို အကူအညီလျှောက်တောင်းပါသည်။ အကူအညီမရခဲ့သလို အရှက်တကွဲဖြစ်ခဲ့ရပါသည်။ ထို့နောက် မိမိ၏လုပ်နိုင်စွမ်းများအား ချထားပြီးဘုရားသခင်ထံ စိတ်နှလုံးအကြွင်းမဲ့ ဒူးထောက်ဆုတောင်း၍ ခိုလှုံကိုးစားသည့်အခါတွင် ဘုရားသခင်၏ မစခြင်းကို ရရှိခဲ့ပါသည်။ လူတိုင်းသည် ဘဝတွင်အခက်ခဲ ဆုံးအချိန်များ ဘဝတွင် တစ်ကြိမ်မဟုတ် တစ်ကြိမ် ကြုံဖူးကြမည်ဖြစ်သည်။ လူ၏ ကူညီမစမှုသည် အတိုင်းအတာထိသာ ရှိသည်။ သို့သော် ဘုရားသခင်၏ မစခြင်းသည် ယုံကြည်သူသားသမီးတိုင်းအတွက် စိတ်ချလုံခြုံမှုကို ပေးပါသည်။ ဘုရားသခင်သာလျှင် ကျွန်ုပ်တို့၏ ခိုလှုံရာ ရဲတိုက်ဖြစ်တော်မူသောကြောင့် ထိုဘုရားသခင်ကိုသာ စိတ်နှလုံးအကြွင်းမဲ့ ကိုးစားကာ ဘဝအသက်တာကို လျှောက်လှမ်းကြပါစို့…
ဖလားဆဲ
