ချန်ထားခဲ့လိုက်ပါ
16.6.2022(Thursday)
ဖိလိပ္ပိ ၃:၁၃“ညီအစ်ကိုတို့ ငါကိုင်မိပြီဟုကိုယ်ကိုကိုယ်မထင်သော်လည်း ငါပြုသောအမှုတစ်ခုဟူမူကား၊ နောက်ကျသောအရာတို့ကိုမမှတ်ဘဲ၊ရှေ့၌ရှိသောအရာတို့ကိုလှမ်းကမ်း၍..”
ကျွန်တော်တို့ တစ်နှစ်ထက်တစ်နှစ် ကျော်ဖြတ်လာနိုင်ခြင်းမှာဘုရားသခင်ကျေးဇူးတော်သက်သက်သာဖြစ်ပါသည်။ ကုန်လွန်ခဲ့သော နေ့ရက်များကို ပြန်လည် စောင်းငဲ့ကြည့်ပါက လှပသောအတိတ်များရှိသလို ဆိုးရွားသောအတိတ်များလည်းရှိမည်ဖြစ်သည်။
အတိတ်၏အရိပ်သည် ကောင်းမွန်သောအရာမဟုတ်ပါက ကျွန်တော်တို့၏ ရှေ့အနာဂတ်ခရီးကို အနှောင့်အယှက်ဖြစ်လာမည်ဖြစ်သည်။ စာရေးသူဖတ်မိသော ဂျွန်အောစတင်း၏ စာစုလေးကို ပြန်လည်သတိရမိပါသည်။ “လူအများစုက မိမိတို့အသက်တာထဲမှ အတိတ်၏အရိပ်ဖြစ်သော ကျရှုံးခြင်းတံခါးပေါက်ကို ခနခနပြန်လည်ကြည့်သောကြောင့် ကျရှုံးခြင်းထဲတဝဲလည်လည်ဖြစ်နေကြသည်”ဟုပြောခဲ့ပါသည်။ အတိတ်ဟုပြောသည့်အခါတွင် သမ္မာကျမ်းစာထဲရှိ ဘုရားသခင်အသုံးပြုသောသူများ၏ ဖြတ်သန်းမှုအားဖြင့် ပြန်လည်ခွန်အားယူကြရမည်ဖြစ်သည်။ ရှင်ပေတရု၊ ရှင်ပေါလု၊ဒါဝိဒ်၊ တို့သည်လည်း အတိတ်၏ကျရှုံးခြင်း၊ထောက်ချောက်များထဲ၌ လဲကျခဲ့ဖူးကြပါသည်။ သို့သော ထိုသူများသည် အတိတ်ကို ချန်ထားခဲ့ကာ ဘုရားသခင်၏ ချီးမြောက်ခြင်းကို ခံခဲ့ရပါသည်။ ထို့ကြောင့် အတိတ်၏ကျရှုံးမှုများသည် ကျွန်တော်တို့၏ ရှေ့ဆက်ရမည့်ဘဝခရီးအတွက် ဆူးညှောင်ခလုတ်ဖြစ်စေနိုင်သောကြောင့် အတိတ်ကို ချန်ထားခဲ့ပြီး ဘုရားသခင်ပြင်ဆင်ပေးသောနေ့ရက်တိုင်းကို ဝမ်းမြောက်စွာကျော်ဖြတ်ကြရအောင်ဟု အားပေးပါရစေ။
ဖလားဆဲ
