လျှာအားဖြင့်သာ

လျှာအားဖြင့်သာ

25.5.2022(Wednesday)

ဆာလံကျမ်း ၁၄၁:၃“အိုထာဝရဘုရားအကျွန်ုပ်၏အရှေ့မှာ ကင်းကိုထားတော်မူပါ။အကျွန်ုပ်၏ နှုတ်ခမ်းတံခါးကို စောင့်တော်မူပါ”

ကျွန်တော်တို့ကိုယ်ခန္ဓာ၏အစိတ်အပိုင်းများတွင် လျှာသည် အရေးပါသောဂဏ္ဍတွင် တစ်ခုအပါအဝင်ဖြစ်ပါ၏။ လျှာအားဖြင့် လူပေါင်းများစွာကို ခင်မင်ခွင့်ရင်းနှီးခွင့်ရရှိကြပါသည်။

တစ်ခါက ဘုရင်ကြီးတစ်ပါးသည် သူ၏အတော်ဆုံးအစေခံ စားတော်ကဲကို အကောင်းဆုံးဟင်းလျာချက်ဖို့ရန် စေခိုင်းလိုက်ပါသည်။ သူ၏စားတော်ကဲလည်း အကောင်းဆုံးပြင်ဆင်ပြီးနောက် ဘုရင်ကြီးထံဆက်သလိုက်ပါသည်။ ထူးခြားချက်ကတော့ ဟင်းလျာတိုင်းသည် လျှာပေါင်းစုံနှင့်ချက်ထားသောဟင်းလျာဖြစ်ပါသတဲ့။ ထိုအခါ ဘုရင်ကြီးမှမကြိုက်၍ငြင်းလိုက်သောအခါ စားတော်ကဲက”အရှင်မင်းကြီး..လျှာထက်ကောင်းတာဘာများရှိသေးလို့တုန်း.လျှာနဲ့ ပညာတွေသင်ယူလို့ရ၊ စီးပွားတွေ ကူးသန်းရောင်းဝယ်လို့ရပါတယ်”ဟု ပြန်လျှောက်လိုက်ပါသည်။ ဘုရင်ကြီး လည်း ထိုစကားကိုကြားသောအခါ အင်မတန်မှ အံ့ဩသွားခဲ့ရပါသည်။ မကြာမှီပင်ဘုရင်ကြီးလည်း စားသောက်ပွဲကြီး‌ နောက်တစ်ကြိမ်ကျင်းပပါသည်။ ယခုတစ်ကြိမ်မှာတော့ တောထဲမှ အဆိုးဆုံးတိရစ္ဆာန်များ၏ အသားကို ချက်ခိုင်းလိုက်ပါသည်။ ထိုနောက်စားတော်ကဲကြီး ထပ်မံပြင်ဆင်ရပြန်ပါသည်။ ဤအခါတွင်လည်း လျှာဟင်းလျာကို ဘုရင်ကြီးထံဆက်သံလိုက်ပါသည်။ ဘုရင်ကြီးက အင်မတန်မှစိတ်ဆိုးပြီး သူ့အားအပြစ်တင်လိုက်ပါသည်။ ထိုအခါမှာတော့ စားတော်ကဲကြီးက“အရှင်မင်းကြီး…လျှာထက်ဆိုးရွားတာရှိအုံးမလား၊ လျှာအားဖြင့် နိုင်ငံတော်ကြီးပျက်စီး၊မတရားမှု၊စစ်ပွဲတွေ၊ သတ်ဖြတ်မှုတွေ ဖြစ်လာတာပါ”ဟု လျှောက်တင်လိုက်ပါတော့သည်။ ဘုရင်ကြီးလည်း အမြင်မှန်ရပြီး စားတော်ကဲ၏စကားကို လက်ခံလိုက်ရပါသည်။ ထိုကြောင့် ကျွန်တော်တို့သည်လည်း မိမိ၏လျှာအားဖြင့် သူတစ်ပါးအား ထိမိ၍ လဲစရာမဖြစ်စေဘဲ တည်ဆောက်စရာဖြစ်စေခြင်းငှါ ကောင်းသောစကားများကို ပြောဆိုကြပါစို့။

ဖလားဆဲ

Reference>>ဇို(တီးတိန်)