လဲရာမှပြန်ထ
9.4.2022(Saturday)
သူတ္တံကျမ်း ၂၄:၁၆“ဖြောင့်မတ်သောသူသည် ခုနှစ်ကြိမ်လဲသော်လည်း ထပြန်လိမ့်မည်”
ကျွန်တော်တို့၏ ဘဝအသက်တာတွင် တစ်ခါတစ်ရံ လူမှုရေး၊ စီးပွားရေး၊ပညာရေး အဘက်ဘက်တွင် လဲကျသော အချိန်မျိုးရှိမည်ဖြစ်သည်။ လူသားအနေဖြင့် ရှောင်ဖယ်လို့လည်း မရပေ။ဖြတ်သန်းကြရပါသည်။
အမေရိကန်သမ္မတဟောင်း အာဗြံဟံလင်ကွန်း၏ နာမည်ကျော်စကားတစ်ခုရှိပါသည်။ ထိုစကားကတော့“မင်းလဲကျမှာကို ငါမစိုးရိမ်ဘူး။ ဒါပေမဲ့ မင်းပြန်မထမှာကိုတော့ ငါစိုးရိမ်တယ်”ဟု ပြောခဲ့ပါသည်။ မှန်ပါသည်။ လူသားအနေဖြင့် တစ်ခါတရံလဲကျတတ်ပါသည်။ သို့သော် ပြန်ရုန်းထမှသာ အရာရာကို ကျော်လွှားနိုင်မည်ဖြစ်သည်။ ဥပမာအနေဖြင့်-ကလေးငယ်လေးတစ်ယောက်သည် လမ်းလျှောက်တတ်ခါစတွင် ခနခနလဲလဲကျတတ်ပါသည်။သို့သော် လဲကျတိုင်းပြန်ရုန်းထပါသည်။ ပြန်ရုန်းထတတ်သောစိတ်သဘောကြောင့် နောက်ဆုံးတွင် ကလေးငယ်လေးသည် လဲမကျတော့ဘဲ ကောင်းမွန်စွာ လမ်းလျှောက်လာနိုင်ပါသည်။ ကလေးများထံမှ ကျွန်တော်တို့သည် ပြန်လည် သင်ယူရသော အချိန်မျိုးရှိပါသည်။နှုတ်ကပတ်တော် သမ္မာကျမ်းစာထဲ ဒါဝိဒ်၊ပေါလု၊ပေတရုတို့သည် မတူညီသော ဘဝအတွေ့အကြုံများအားဖြင့် လဲကျသော အချိန်မျိုးကျော်ကြရပါသည်။ သို့သော်နောက်ဆုံးတွင် ဘုရားပေးသောခွန်အားဖြင့် တန်ဖိုးရှိသောသူ၊ဘုရားသခင်၏စိတ်သဘောတော်နှင့်ညီသောသူများဖြစ်လာခဲ့ပါသည်။ထို့ကြောင့် ဖြောင့်မတ်သောသူသည်ခုနှစ်ကြိမ်လဲသော်လည်း ပြန်ထလိမ့်မည်ဟူသောဂတိတော်ကို ဆုပ်ကိုင်ရင်း လျှောက်လှမ်းကြပါစို့ဟု အားပေးပါရစေ။
ဖလားဆဲ
