ခရစ်တော်၌တစ်ကိုယ်တည်း
2.8.2022( Tuesday)
ရောမ ၁၂:၅” ထို့အတူ၊ အများဖြစ်သောငါတို့သည် ခရစ်တော်၌ တကိုယ်တည်းဖြစ်၍ ၊ အသီးသီးအင်္ဂါချင်းဖြစ်ကြ၏”
လူတစ်ယောက်နှင့်တစ်ယောက်ကို ဘုရားသခင်သည် မတူညီသော သွင်ပြင်လက္ခဏာများဖြင့် ဖန်ဆင်းထားခြင်းဖြစ်သည်။ စိတ်နေစိတ်ထား၊အကြိုက်များမတူသလို လုပ်ဆောင်နိုင်မှုများ၊ ဝါသနာများကလည်းမတူညီကြပေ။ တစ်ဦးနှင့်တစ်ဦးအကြိုက်များ၊ဝါသနာများ၊ လုပ်ဆောင်မှုများ အလုံးစုံတူညီနေပါက လည်းကမ္ဘာကြီးသည် အင်မတန်မှ ပျင်းဖို့ကောင်းသွားပါလိမ့်မည်။ သခင်ယေရှုသည် အမှုတော်မြတ်ထဲ၌ တာဝန်များကို ထမ်းဆောင်ရန်တပည့်တော်(၁၂)ပါးကို ရွေးချယ်ခဲ့ပါသည်။ လူအတန်းအစားပေါင်းစုံထဲမှ သူနှစ်သက်သောသူများကို ရွေးထုတ်ခဲ့ပါသည်။ တပည့်တော်တစ်ဦးချင်းစီတိုင်း၏ အရည်အချင်းများသည်လည်း တစ်ဦးနဲ့တစ်ဦးမတူညီကြပေ။ သို့သော်ဘုရားသခင်သည် ထိုသို့ မတူညီကွဲပြားသောအရည်အချင်းများကို တစုတစည်းထဲပေါင်းစုံကာ သူ၏အမှုတော်မြတ်ထဲတွင်အသုံးပြုခဲ့ပါသည်။ ထိုတပည့်တော်(၁၂)ပါးအားဖြင့်လည်း ကမ္ဘာကြီးကို တုန်လှုပ်စေကာ အံဩဘွယ်ရာသတင်းကောင်းကိုလူသားတိုင်းအားသိရှိစေခဲ့ပါသည်။
ထို့နည်းတူစွာပင် ကျွန်တော်တို့တွင် ဘုရားသခင်ပေးထားသော ဆုကျေးဇူး၊ အစွမ်းအစများကိုယ်စီရှိကြပါသည်။ မိမိပိုင်ဆိုင်ထားသောဆု ကျေးဇူး၊အစွမ်းအစများကို ဘုရားသခင်၏အမှုတော်မြတ်ထဲ၌ အသုံးမခံပါက တာဝန်ကျေသောသူဖြစ်မည်မဟုတ်ပေ။ ထို့ကြောင့် ကျွန်တော်တို့သည် ခရစ်တော်၌ တစ်ကိုယ်တည်းဖြစ်သောကြောင့် မိမိတို့၏အစွမ်းအစ၊ အရည်အချင်းများကို ဘုရားသခင်၏အမှုတော်မြတ်ထဲ၌ ပါဝင်အသုံးတော်ခံခြင်းဖြင့် ဘုရားဘုန်းတော်ထင်ရှားစေကြရအောင်ဟု တိုက်တွန်းလိုပါရစေ။
ဖလားဆဲ
