ကောင်းသောအမှု
31.7.2022( Sunday)
တိတုဩဝါဒစာ ၃:၁၄” ငါ၏လူများတို့သည် အသီးမဲ့သောသူမဖြစ်၊ ကိုယ်သုံးစရာဖို့ရှိရမည်အကြောင်း၊ ကောင်းသောအကျင့်ကို ကျင့်အံ့သောငှာ သင်ကြစေ”
ကောင်းသောအမှုကို ပြုသောသူကို လူသားတိုင်းလေးစားကြည်ညိုကြပါ၏။ ဆရာကြီးတစ်ယောက်က ကျွန်တော့်ကိုပြောဖူးသော စကားသုံးခွန်းကို ပြန်လည်ဝေငှလိုပါသည်။ ထိုစကားသုံးခွန်းကတော့”လူတစ်ယောက်သည် စည်းစိမ်ဥစွာဆုံးရှုံးလျှင် ဘာမျှ မဆုံးသေးပါ။ ကျန်းမာရေးဆုံးရှုံးလျှင် တချို့တဝက်ဆုံးရှုံးမည်။ ကိုယ်ကျင့်တရား ယိုယွင်းလျှင်ကား ဘဝတစ်ခုလုံး အများသူငှါ၏ လက်ညိုးထိုးဖြစ်ပေမည်”ဟု ပြောခဲ့ပါသည်။ အမှန်တကယ်ပင် ထိမိသောစကားများပင်ဖြစ်သည်။ ယနေ့တွင် ပရဟိတအသင်းအဖွဲ့များ၊ နာရေးကူညီမှုအသင်းအဖွဲ့များ၊ခရစ်ယာန်အဖွဲအစည်းများထဲမှ ကူညီမစသော အဖွဲ့အစည်းများကိုအင်မတန်မှ လေးစားမိပါသည်။ ကောင်းသောအမှုများကို လုပ်ဆောင်နေသရွေ့ လူအများလေးစားမှုများကို ရရှိမည်ဖြစ်သည်။ သာသနာပြုဆရာကြီး ဂျွန်ဝက်စ်စလီ( John Wesley) ၏ လင်္ကာလေးတစ်ခုနဲ့အဆုံးသတ်လိုပါသည်။
” ဘယ်နည်းနဲ့ဖြစ်ဖြစ် လုပ်ဆောင်နိုင်သမျှလုပ်ပါ
ဘယ်လမ်းနဲ့ဖြစ်ဖြစ် လုပ်ဆောင်နိုင်သမျှလုပ်ပါ
ဘယ်နေရာမှာဖြစ်ဖြစ် လုပ်ဆောင်နိုင်သမျှ လုပ်ပါ
ဘယ်သူနဲ့ဖြစ်ဖြစ် လုပ်ဆောင်နိုင်သမျှ လုပ်ပါ
ဘယ်လောက်ကြာကြာ အမြဲတမ်းကောင်းတာကို
လုပ်ဆောင်ပါ” ဟူ၍ တိုက်တွန်းခဲ့ပါသည်။
ထို့ကြောင့် ယုံကြည်သူတစ်ယောက်အနေဖြင့်ကောင်းသောအမှုကို လုပ်ဆောင်ရန်အစဉ်အမြဲ မိမိအသက်တာကို ပြင်ဆင်ရမည်ဖြစ်သည်။ တရားကိုနာရုံမျှသာမဟုတ်ဘဲ လက်တွေ့ကောင်းသောအမှုကို ပြုသောသူသည် ဘုရားဘုန်းတော်ထင်ရှားစေသောသူဖြစ်သည်။
ဖလားဆဲ
