အချိန်ပေးခြင်းဖြင့်
21.7.2022 (Thursday)
မသဲ ၂၂:၃၉ (က)” ထိုမှတစ်ပါး ကိုယ်နှင့်စပ်ဆိုင်သောသူကို ကိုယ်နှင့်အမျှချစ်လော့”
လောကတွင်အစားထိုးလို့မရတဲ့အရာ နှစ်ခုရှိသည်ဟု လူအများက ဆိုကြပါသည်။ ထိုအရာကတော့ အချိန်နှင့်မိဘဟု ဆိုကြပါသည်။ မိဘသည်လည်းအစားထိုးဖို့မလွယ်သလို အချိန်သည်လည်း အစားထိုးလို့မရနိုင် ပေ။ အချိန်ဟုဆို သည့်အခါတွင် လူသက်တမ်းသည် နှစ်ခုနှစ်ဆယ်ဟု ပျမ်းမျှသတ်မှတ်ထားကြပါသည်။ လူ့ဘဝတွင်အသက်ရှင်ရသော အချိန်ကာလသည် အင်မတန်မှ တိုတောင်းလွန်းလှပါသည်။ တစ်နှစ်တွင် ရက်ပေါင်း (၃၆၅)ရက်ရှိပါသည်။ နှစ်ခုနှစ်ဆယ်အသက်ရှင်ရမည်ဆိုလျှင် ရက်ပေါင်း (၂၅၅၅၀) ခန့်သာအသက်ရှင်ရမည်ဖြစ်သည်။ တိုတောင်းလှ သောဘဝရီးတွင် အချိန်ကို အကျိုးရှိစွာ အသုံးချပြီး အသက်ရှင်မှသာ လူဖြစ်ရကျိုးနပ်မည်ဖြစ်သည်။ သခင်ယေရှူပေးခဲ့ သော ပညတ်နှစ်ခုသာရှိပါသည်။ ပထမတစ်ခုက ထာဝရဘုရားကိုစိတ်နှလုံးအကြွင်းမဲ့ချစ်ဖို့ရန်နှင့် ဒုတိယတစ်ခုကတော့ ကိုယ်နှင့်စပ်ဆိုင်သောသူကို ကိုယ်နှင့်အမျှချစ်ဖို့ရန်ဖြစ်သည်။ကျွန်တော်တို့၏ဘဝအသက်တာထဲတွင် ဘုရားသခင်အားချစ်ဖို့လိုသလို သူတစ်ပါးအားချစ်ဖို့ရန် အချိန်ပေးဖို့ရန်လည်း လိုအပ်ပါသည်။ ဆင်းရဲသူဖြစ်စေ ချမ်းသာသူဖြစ်စေ တစ်ရက်လျှင် (၂၄) နာရီသာအချိန်ရရှိကြပါသည်။ အချို့ကတော့ မိမိအချိန်ကို မိမိကိုယ်ကျိုးအတွက်ပဲ အသုံးပြုသလို အချို့ကတော့ သူတစ်ပါးအကျိုးအတွက် ပေးဆပ်သူများလည်းရှိကြပါသည်။ အကန့်အသတ်ဖြင့် အသက်ရှင်ရသောဘဝ တစ်ခုတွင် အများအကျိုးအတွက်ပေးဆပ်အသက်ရှင်သူများသာ အမည်ကျန်ခဲ့ကြပါသည်။ အိန္ဒိယနိုင်ငံရှိ ပြည်သူပြည်သားများသည်Mother Teresa၏ အကြောင်းကို ယနေ့ထိတိုင်အောင် တသသပြောနေကြဆဲဖြစ်ပါသည်။ သူမ ဘဝ၏ အဖြစ်အပျက်လေးတစ်ခုကို ဖော်ပြလိုပါသည်။ တစ်နေ့တွင် သူမဆီသို့ နေထိုင်မကောင်း၍ ကျန်းမာရေးဆိုးဝါးသော ဆင်းရဲနွမ်းပါးသူတစ်ဦးသည် ဆေးဖိုးဝါးခ ကူညီရန် အကူအညီလာတောင်းပါသည်။ ထို့သိုလာတောင်းသောအခါတွင် သူမထံတွင် ဆေးဝယ်စရာ ပိုက်ဆံလုံးဝမရှိ သောအချိန်ဖြစ်ပါသည်။ သို့သော်သူမသည် ကြံရာမရအဆုံး အရဲစွန့်၍ ဆေးဆိုင်သို့ သွားပြီးဆေးများကိုမှာပြီးနောက်တွင် ဆေးဖို့မပေးနိုင်သောကြောင့် ရှိသမျှအားဖြင့် အသကုန်ပြေးကာ လူနာဆီသို့အရောက်ပြန်လာခဲ့ရပါသည်။ ထို့အဖြစ်အပျက်ကို တွေ့ရှိသောသူတစ်ဦးက အကျိုးအကြောင်းကိုသိရှိပြီးနောက်တွင် ဆေးဖိုးဝါးခများကို စိုက်ပေးခဲ့ရပါသည်။ ဤအဖြစ်အပျက်ကိုကြည့်ခြင်းအားဖြင့် Mother Teresa ၏ သူတစ်ပါးအပေါ်ချစ်ခြင်းမေတ္တာကြီးမားပုံကို မြင်တွေ့ရမည်ဖြစ်သည်။သူမသည် အိန္ဒိယနိုင်ငံ၌ရှိသော ဆင်းရဲနွမ်းပါးသူ အငယ်ဆုံးသော သူများအတွက် အချိန်ပြည့်ပေးဆပ်အသက်ရှင်ခဲ့ပါသည်။ထိုကြောင့်လည်း သူမ၏ လုပ်ဆောင်မှုများကို ယနေ့ထိတိုင်အောင် လူအများ လေးစားတန်ဖိုးထားကြပါသည်။ ထို့အတူပဲ ကျွန်တော်တို့၏ ပတ်ဝန်းကျင်တွင် ကျွန်တော်တို့၏ မေတ္တာကို လိုအပ်နေသော သူများရှိကြပါသည်။ ချစ်ခြင်းမေတ္တာကို အချိန်ပေးခြင်းဖြင့်သာ ဖော်ပြရပါမည်။ ကျွန်တော်တို့၏ အချိန်ကိုမပေးပါက ကျွန်တော်တို့၏ ဘဝသည် အနှစ်သာရရှိတော့မည်မဟုတ်ပေ။ ဒါကြောင့် နေ့ရက်စဉ်တိုင်း ချစ်ခြင်းမေတ္တာ၌အရင်းတည်ပြီး သူတစ်ပါးအားအချိန်ပေးခြင်းဖြင့် အသက်ရှင်ကြရအောင်။
ဖလားဆဲ
